Protesta e opozitës, reagon Ministria e Brendshme: Institucionet u sulmuan, por mungoi përdorimi masiv i molotovit

Protesta e opozitës, reagon Ministria e Brendshme: Institucionet u sulmuan, por mungoi përdorimi masiv i molotovit
Pas mbylljes së protestës së opozitës reagon edhe Ministria e Brendshme përmes një dalje për media të zëvendësministrit Besfort Lamallari.

Në një deklaratën e tij Lamallari tha se të gjithë institucionet u sulmuan në mënyrë të jashtëligjshme, por mungoi përdorimi masiv dhe i koordinuar i bombave molotov, që sipas tij kjo ndodh kur drejtuesit e protestës angazhohen seriozisht të kontrollojnë dhunën.

“Protesta e sotme e Partisë Demokratike nuk arriti të futej në hullitë e ligjit. Ajo u shoqërua me një përdorim të madh të mjeteve të ndaluara dhe të rrezikshme shpërthyese, të gurëve dhe mjeteve të tjera përfshirë dhe pak bomba molotov.

Si rezultat i dhunës u lënduan policë, të cilët janë duke marrë ndihmën mjekësore në spitale, si edhe u thyen xhamat e dritareve në Drejtorinë e Policisë së Tiranës. Institucione kushtetuese si Parlamenti i Shqipërisë dhe Kryeministria u sulmuan sërish sot në mënyrë të jashtëligjshme.

Por krahasuar me sulmet e të shtunës, protestës së sotme i mungoi përdorimi masiv dhe i koordinuar i bombave molotov, çka tregon se kur drejtuesit e protestës angazhohen seriozisht janë të aftë ta kontrollojnë dhunën e militantëve”, deklaroi Lamallari.

Sipas tij, protesta e sotme prodhoi paligjshmëri të shumta dhe vijoi të mbetet pa asnjë masë sigurie të marrë nga organizatorët e saj.

“Trafiku rrugor pësoi bllokime të vazhdueshme në disa akse kryesore të qytetit dhe pavarësisht përpjekjes së vazhdueshme të efektivëve të policisë rrugore, dëshirojmë t’i kërkojmë ndjesë qytetarëve për vështirësitë në lëvizje mbrëmjen e sotme.

Ministria e Brendshme shpreh mirënjohje për angazhimin profesional dhe për vetëpërmbajtjen e admirueshme të të gjithë forcave policore përballë provokimeve të shumta dhe të vazhdueshme”, vijoi zëvendësministri.

Më tej Lamallari ai tha se strukturat e rendit dhe sigurisë publike janë të motivuara dhe të përgatitura për të kryer me përpikëri, profesionalizëm dhe përgjegjshmëri të lartë detyrën në shërbim të ruajtjes së një mjedisi të lirë, të qetë dhe të sigurt, ku gjithkush ka mundësi të ushtrojë të drejtat demokratike. /l.k./

Foto Google

loading...
loading...