KRIZA POLITIKE/ Aleatët e Bashës takohen me Metën: Po rrezikohet pluralizmi politik

KRIZA POLITIKE/ Aleatët e Bashës takohen me Metën: Po rrezikohet pluralizmi politik
Pesë kryetarë të parive aleate më Partinë Demokratike, të organizuara në Grupimin e Qendrës së Djathtë, janë takuar sot me Presidentin e Republikës për të diskutuar situatën politike në vend.

Takimi nuk ka prodhuar rezultat konkret, por të dyja palët janë shprehur për “angazhim për të nxitur dialogun politik”.

“Presidenti vlerësoi kërkesën e partive tona. Në vlerësim të kërkesës sonë do të ndërmarrë veprimet e veta edhe për diskutim me palët e tjera politike. Mendoj që Presidenti i Republikës jo vetëm është në një valë shqetësimi për situatën në vend po ka dhe angazhim me palët për t’iu përgjigjur situatës”, tha pas takimit kryetari i Partisë Republikane, Fatmir Mediu.

“Kreu i Shtetit shprehu shqetësimin se mosregjistrimi i të gjitha partive opozitare të legjislaturës së fundit parlamentare rrezikon jo vetëm standardet e zgjedhjeve, por edhe pluralizmin politik në vend”, thuhet në njoftimin e Presidencës. /a.a/ Albanian Free Press Online/

Foto: Google

 

Njoftimi i plotë i Presidencës:

Presidenti i Republikës, Sh.T.Z. Ilir Meta priti sot me kërkesë të tyre kryetarët e partive politike të Grupimit të Qendrës së Djathtë, kryetarin e Partisë Republikane, z.Fatmir Mediu, kryetarin e Partisë Agrare Ambientaliste, z.Agron Duka, kryetarin e Partisë Bashkimi për të Drejtat e Njeriut, z.Vangjel Dule, kryetarin e Partisë Demokristiane, z.Nard Ndoka dhe dëgjoi me vëmendje çështjet e ngritura gjatë takimit.

Presidenti Meta shprehu shqetësimin e thellë për krizën serioze kushtetuese, institucionale dhe të përfaqësimit ku ka hyrë vendi.

Kreu i Shtetit theksoi se më herët kishte paralajmëruar domosdoshmërinë e vendosjes urgjente të dialogut për shmangien e përshkallëzimit të konfliktit.

Presidenti Meta nënvizoi se ka bërë çdo përpjekje për të nxitur zbatimin e reformës në drejtësi brenda afateve dhe parimeve kushtetuese që do të garantonin kontrollin e balancën e sistemit në një shtet funksional të së drejtës.

Nëse kjo do të kishte ndodhur, kriza aktuale politike nuk do të kishte marrë këto përmasa.

Kreu i Shtetit shprehu shqetësimin se mosregjistrimi i të gjitha partive opozitare të legjislaturës së fundit parlamentare rrezikon jo vetëm standardet e zgjedhjeve, por edhe pluralizmin politik në vend.

Presidenti Meta thekson se nuk është asnjëherë vonë për të reflektuar dhe për të gjetur zgjidhje që do të rivendosnin normalitetin kushtetues, institucional dhe demokratik të vendit.

Presidenti Meta nxit dialogun dhe zërat e arsyeshëm, për dekurajimin e përshkallëzimit të mëtejshëm të krizës.

Kreu i Shtetit do të vazhdojë kontributin e Tij, me të gjitha format e mundësitë për të kërkuar reflektimin e të gjithëve, me qëllim garantimin, jo vetëm të bashkëjetesës demokratike, por edhe ecurinë e suksesshme dhe të besueshme të reformave të lidhura me integrimin europian.