Deputetja Hajdari takon ambasadoren gjermane: Sjellja e politikës Shqiptare është modeli më i keq i mundshëm

Deputetja Hajdari takon ambasadoren gjermane: Sjellja e politikës Shqiptare është modeli më i keq i mundshëm
Deputetja Rudina Hajdari ka zhvilluar ditën e sotme një takim me ambasadoren gjermane në Tiranë, Sussane Shütz.

Në fokus të takimit ka qenë situata e tensionuar politike dhe institucionale në vend.

Sipas Hajdarit dorëzimi i mandateve nga opozita nuk është një zgjidhje efikase pasi nuk mund të rrimë duar kryq dhe të presim.

“BE kërkon me të drejtë përgjegjshmëri të lartë dhe integritet nga politikanët shqiptarë, nga qeveria dhe opozita.

Është e papranueshme që politika në tërësi të vazhdojë me modelin e vjetër që nuk përfaqëson aspak qytetarët Shqiptarë, aspiratat, qëllimet dhe vlerat e tyre. Dorëzimi në bllok i mandateve nga ana e opozitës nuk është zgjidhje ashtu siç nuk është aspak zgjidhje arroganca qeveritare.

Sjellja e politikës Shqiptare sot është modeli më i keq i mundshëm që po i ofrojmë qytetarëve Shqiptarë dhe sidomos të rinjve.

Nuk mund të rrimë duar-kryq dhe të presim që ky ngërç i paprecedent politiko-institucional të zgjidhet vetë. Situata mund të agravojë kur aktorët nuk vlerësojnë siç duhet rrethanat. Të gjithë aktorët kanë detyrimin që të reagojnë sa më parë për të orientuar një zgjidhje politike të gjithëpranueshme për krizën e paprecedentë në cilën gjendet sot Shqipëria, për një zgjidhje që siguron në radhë të parë interesin qytetar dhe kombëtar, pa çeduar demokracinë me qëllim që të ndikojmë pozitivisht të ardhmen e Shqipërisë dhe anëtarësimin e saj në BE”, shprehet Hajdari.

/f.ç/Albanian Free Press Online/