Studentët i përgjigjen Ramës me 5 fakte, protesta vijon nesër përpara Ministrisë së Arsimit

Studentët i përgjigjen Ramës me 5 fakte, protesta vijon nesër përpara Ministrisë së Arsimit
Lëvizja për Universitetin ka reaguar sërish ndaj kryeministrit Rama duke deklaruar se nivelin e financimeve publike dhe tarifën maksimale për shkollën e lartë e vendos qeveria.

Përmes një postimi në rrjetin social Facebook, studentët i kërkojnë qeverisë të rrisë buxhetin për arsimin dhe të ulë tavanin e tarifave vjetore për studimet e larta.

Sa i përket tarifës që paguhet për provimet e mbartura në vjeshtë, studentët sqarojnë se jo të gjithë janë mbetës dhe se shumë e bëjnë këtë edhe për përmirësim të notave. Por shumë prej tyre zgjedhin t’i shtyjnë provimet pasi studiojnë dhe punojnë njëkohësisht. Lidhur me faktin e sqaruar nga kryeministri se tarifat për provimet e mbartura do të hyjnë në fuqi vitin e ardhshëm, “Lëvizja për Universitetin” deklaron se mbron interesat e mijëra studentëve që do të nisin në vazhdimësi shkollat e larta.

Reagimi i "Lëvizjes për Universitetin"

Përgjigje kryeministrit:

  1. Nivelin e financimit të universiteteve publike dhe tarifën maksimale e vendos qeveria. Rrisni buxhetin dhe ulni tavanin! Pastaj universitetet mund të propozojnë uljen e tarifave.
  2. Në vitin 2014 tarifat janë rritur sa për pesë vite të mëparshme rresht. Përveç kësaj, ne kërkojmë përgjysmimin e tyre deri në realizimin e parimit arsim publik falas. E kupton logjikën apo ke nevojë për një orë leksioni?!
  3. Ne nuk jemi mbetës. Jemi mijëra studentë që punojmë dhe studiojmë fort. Prandaj shumë prej nesh zgjedhin t’i shtyjnë provimet, që të kemi mundësi të studiojmë më shumë.
  4. Ne do të jemi gjallë edhe vitin tjetër. Siç do të futen në universitete dhjetëra mijëra studentë të tjerë. Ne luftojmë edhe për ta.
  5. Rishikimin e v.k.m. e bën autoriteti që e ka hartuar, jo universitetet. Nuk ke një këshilltar që ka pak kulturë juridike?!

Në njoftimin e "Lëvizjes për Universitetin" thuhet se nesër në orën 8.00 të mëngjesit studentët e të gjitha universiteteve publike do të bojkotojnë sërish mësimin duke u grumbulluar në oborret e fakulteteve përkatëse për të marshuar drejt Ministrisë së Arsimit. Në orën 10.00 protestojmë përpara Ministrisë deri në plotësimin e të gjitha kërkesave!

Qeverisë i kërkojmë:

  1. Anulimin e Vendimit të Këshillit të Ministrave nr. 288, të miratuar më 21.05.2018, sidomos pikën 4 të tij që u vendos një gjobë të padrejtë studentëve për provimet e mbartura.
  2. Rritjen e buxhetit të shtetit për universitetet publike dhe përgjysmimin e të gjitha tarifave universitare duke ulur tavanin e tarifës maksimale.

Ndërsa autoriteteve drejtuese të universiteteve publike u kërkojmë:

  1. Ndarjen e pagesës së tarifës në dy këste.
  2. Shtyrjen e afatit të pagesës së secilit këst përtej sezonit të provimeve të semestrit të parë.

REZISTENCA VAZHDON!

 

Shpërndajeni me miqtë tuaj: