Komiteti i Stabilizim-Asociimit voton amendamentet e PD, Pollo i kënaqur: Ndryshe nga çfarë ndodh në Kuvend...

Komiteti i Stabilizim-Asociimit voton amendamentet e PD, Pollo i kënaqur: Ndryshe nga çfarë ndodh në Kuvend...
Partia Demokratike ka dalë e kënaqur nga mbledhja e Komitetit të Stabilizim-Asociimit që u zhvillua dy ditët e fundit në Tiranë.

Deputeti Genc Pollo tha pas mbledhjes se dokumenti përfundimtar i dalë nga kjo mbledhje “është një dokument i mirë me të cilin ne jemi të gjithë të kënaqur, se ndryshe nga ç’ndodh në seancë plenare, vendimet morën votat e mazhorancës dhe të europarlamentarëve”.

Më herët, opozita kishte ngritur një sërë shqetësimesh që kërkonte të pasqyroheshin në dokumentin përfundimtar, sikurse ishte blerja e votave dhe keqpërdorimi i pushtetit; heqja e imunitetit parlamentar, kur ai kërkohet nga organet e drejtësisë; çrrënjosja e kultivimit të drogës dhe ndjekja penale të kultivuesve, rritja e numrit të azilkërkuesve; vetëvensura në media dhe interesat politikë dhe ekonomikë në media, vlerësimi i brisqeve nga kontratat e koncesioneve etj.

“Ajo që nuk u arrit plotësisht të pranohej nga të gjitha palët ishte çështja e lirisë së shtypit”, tha Pollo.

Propozimet e PD:

  1. Partia Demokratike propozon që pika 5 e rekomandimeve të modifikohet duke vërejtur se blerja e votave dhe keqpërdorimi i pushtetit vazhdoi edhe pas marrëveshjes së 18 Majit.
  2. Për sa u përket zgjedhjeve, Partia Demokratike në një amendament tjetër të saj propozon që rekomandimet e OSBE/ODIHR, përfshirë masat kundër blerjes së votës, duhet të zbatohen para zgjedhjeve të ardhshme.
  3. Lidhur me rolin e Kuvendit, Partia Demokratike propozon që në pikën 9 të shtohet edhe një frazë tjetër, që siguron përfaqësimin e opozitës, nisur nga përjashtimi që qeveria i bëri opozitës nga takimi i fundit i Këshillit të Stabilizim-Asociimit, më 15 nëntor 2017, në Bruksel.
  4. Një amendament tjetër i Partisë Demokratike kërkon heqjen e imunitetit parlamentar, kur ai kërkohet nga organet e drejtësisë. Qeveria refuzoi ta bënte këtë në rastin e Tahirit, çka u kritikua nga grupi i PPE-së, deputetë dhe zyrtarë të qeverive të vendeve anëtare të BE dhe SHBA.
  5. Propozimi i Partisë Demokratike është që të shtohet një pikë në rekomandime për të theksuar së mosndëshkimi i politikanëve të lartë ul besimin e publikut dhe se rregullorja e Kuvendit nuk duhet të ofrojë mbrojtje ndaj të akuzuarve. Partia Demokratike është plotësisht dakord me rekomandimin numër 10, si problemet kryesore që opozita ka ngritur prej 5 vjetësh. Ky është një nga rekomandimet kyçe që Shqipëria të ecë përpara me rrugën e integrimit. Ai vendos theksin tek lufta kundër korrupsionit dhe krimit të organizuar, të kryer nga prokurorë dhe gjyqtarë të pavarur dhe të paanshëm. I kërkon autoriteteve rezultate të pakthyeshme në luftën kundër korrupsionit, krimit të organizuar dhe pastrimit të parave.
  6. Partia Demokratike propozon që pika 11 e rekomandimeve, e cila bën thirrje për çrrënjosjen e kultivimit të drogës dhe ndjekjen penale të kultivuesve. Amendamenti i saj për forcimin e masave kundër drogës, rrjeteve kriminale bazohet në shumë raporte që thonë se bandat e kanabisit janë duke lëvizur drejt drogave të forta si heroina dhe kokaina, duke paraqitur një rrezik edhe më të madh për vendin dhe BE.
  7. Partia Demokratike propozon që, pas pikës 11, të shtohet një pikë tjetër e re, që shpreh shqetësimin për rritjen e numrit të azilkërkuesve nga Shqipëria dhe i kërkon qeverisë ta adresojë më tej këtë fenomen. Në vitin 2017 ka patur një bum të azilkërkuesve nga Shqipëria në vendet e BE-së, veçanërisht në Francë.
  8. Partia Demokratike propozon ndryshimin e fjalisë ku preket çështja e pronave në pikën 13, duke kërkuar zbatimin e vendimit të të Gjykatës Kushtetuese, sepse qeveria vazhdon të zbatojë ligjin e pronave pa marrë parasysh vendimin e kësaj Gjykate për shfuqizimin e pjesshëm të ligjit. Partia Demokratike mbështet plotësisht pikën 14, ku flitet për vetëçensurën dhe ndikimin e interesave politikë dhe ekonomikë në media, por propozon edhe një pikë të re, ku shpreh shqetësim nga përdorimi i gjuhës së urrejtjes dhe sulmeve politike ndaj gazetarëve.
  9. Partia Demokratike propozon gjithashtu, një pikë tjetër të re, në fund të rekomandimeve, që ka të bëjë me vlerësimin e rreziqeve fiskale nga kontratat e konçesioneve, bazuar edhe në raportet e Komisionit Europian dhe FMN-së.

Shpërndajeni me miqtë tuaj: